Мужчына знайшоў два трупы ў кватэры, якую купіў у Мінску. Падрабязнасці інцыдэнту расказалі ў Дзяржкамітэце судовых экспертыз (ДКСЭ).
У пачатку снежня 2024 года ў міліцыю звярнуўся мужчына і паведаміў, што не змог трапіць у кватэру, якую купіў нейкі час таму. Былыя гаспадары на сувязь не выходзілі, на званкі не адказвалі, дзверы ў кватэру былі замкнутыя знутры. Ускрыўшы замкі, уласнік знайшоў трупы мужчын «у стадыі гніласных зменаў». Як высветлілася пазней, аднаму з загінулых было 38 гадоў, другому — 51 год.
На месца здарэння выехала следча-аператыўная група. Падчас агляду трупаў эксперт знайшоў сляды ад ін'екцый. Неўзабаве высветлілася, што былы гаспадар кватэры разам са сваім сябрам купілі «крышталічны парашок белага колеру і з яго дапамогай адсвяткавалі ўдалую ўгоду па продажы нерухомасці».
«Паводле высноваў экспертаў, смерць мужчын наступіла ад вострай інтаксікацыі метадонам, канцэнтрацыя якога адпавядала смяротнай. Ва ўнутраных органах загінулых таксама выяўленыя фенабарбітал, трамадол, запіклон, прэгабалін, кветыяпін», — паведамілі ў ДКСЭ.
Па гэтым факце следчыя распачалі крымінальную справу за незаконны збыт наркатычных сродкаў, які пацягнуў па неасцярожнасці смерць двух чалавек (ч. 5 арт. 328 КК).